Məktəb ləvazimatlarını necə seçmək olar?

Məktəb ləvazimatları dərs ili boyunca fənlərin tələbinə uyğun olaraq istifadə olunur. Kiçikyaşlı şagirdlər bir çox hallarda detallı, rəngarəng və diqqət çəkici məhsullara üstünlük verir ki, mağazalardakı çeşid çoxluğu da eyni dərəcədə işləri çətinləşdirir. Bu baxımdan valideynlərin başlıca məqsədləri övladları üçün ən uyğun, keyfiyyətli və sərfəli ləvazimatları seçməkdir. Bəs həm qənaətcil davranıb, həm də keyfiyyətli məhsullar almaq nə dərəcədə mümkündür?

Tələblərinizi ön plana çəkərək sizin üçün hər məhsula görə müxtəlif meyarlar təyin etdik:

 

ü  İlk öncə diqqət etməli olduğunuz məqam keyfiyyətli məhsul almaqdır. Çünki qənaət niyyətilə seçilən ucuz və keyfiyyətsiz məhsullar uzunmüddətli istifadə üçün sizə yararlı olmayacaqdır. Misal: keyfiyyətsiz rəngli karandaşlar quru olduğu üçün boyamağa daha çox səy tələb edir və nəticə etibarilə ya tez bitir, ya da elə yontulduğu zaman dəfələrlə qırılır. Bu həm övladınız, həm də sizin üçün ürəkaçıcı hal deyil.

ü  Məhsulun keyfiyyətli olmasından əlavə övladınızın yaşını və rəyini də nəzərə almalısınız. Misal: ibtidai sinif şagirdi üçün alınan qalın formalı qələmlər onun istifadəsinə yararlı olmayacaqdır. Qələmi tam tuta bilmədiyi üçün yazılar səliqəsiz ola və barmaqları tez bir zamanda yorula bilər. Bundan əlavə gel qələmlərdən istifadə etməkləri də qadağandır. Tutacaq hissəsində rezin halqası olanlara üstünlük vermək daha yaxşıdır. Diqqət yayındıran və çoxlu detalları olan qələmlərdən bir qədər uzaq qalmaq daha yaxşı nəticələr verə bilər. Qələmin itmə və ya yazmamaq ehtimalına əsasən övladınızın çantasına bir ədəd əlavə qələm də qoya bilərsiniz.

ü  Sadə karandaş seçimi zamanı orta sərtlikdə və kənarları hamar bir model seçmək olar. Başlığındakı silgi böyük rol oynamadığı üçün daha keyfiyyətli, amma silgisiz qələmlərdən də istifadə edilə bilər. Yenə də əlavə bir ədədin çantada olması ehtimallara nəzərən üstünlükdür.

ü  Silgi seçimi zamanı ölçüyə diqqət edin. Kiçik ölçülü silgilər əlverişsiz hesab edilir ki, onu tutmaq çətinləşir və təbii ki istifadəsindən asılı olaraq da tez ovulub bitir. Rəng olaraq isə adətən tünd rənglər kağızda iz buraxdığı üçün ağ və ya boz rəngli pozanlara üstünlük verə bilərsiniz.

ü  Qələmyonan seçərkən isə mütləq şəkildə konteyneri olan məhsullar seçin. İki bölməli olanlar daha yaxşıdır. Həm incə, həm də qalın qələmlər üçün istifadə edilir.

ü  İl ərzində çəkilən rəsmlərin sığması üçün 40 vərəqli albom kifayət edir. Qənaət üçün az səhifəli albom seçməklə xərcinizi ikiyə qatlamış olarsınız. Tövsiyə olunur ki, çox incə vərəqli olanlardan da istifadə edilməsin. Əks halda rəsmi boyayarkən vərəq cırıla və ya korlana bilər.

ü  Əmək dərsi üçün rəngli kağızlar və kartonlar istifadə olunur. Rəngləri dolğun və qalınlığı orta olan kağız seçimi sizi yenə bir addım önə daşıyacaqdır.

ü  Yapışqan aşağı siniflər üçün qələm formalı olmalıdır ki, istifadəsi rahat olsun. Qapağı açıq unudulan maye yapışqan çanta və digər ləvazimatlar üçün təhlükə təşkil edir.

ü  Dəftər seçimi zamanı isə yenidən müəllimin tələb etdiyi səhifə sayını seçmək lazımdır.

Daha səliqəli saxlamaq üçün isə üzlüklərdən istifadə edilməlidir. Beləliklə hələ dəftər dolmamış yenisini almaq ehtiyacı yaranmayacaqdır.

ü  Əgər ibtidai sinif üçün alırsınızsa qayçının ucları yuvarlaq və ya bağlı olmalıdır ki, ani bir reaksiya və ya hərəkətlə kimsə xəsarət almasın. Məktəbəqədər qruplarda və ya ibtidai siniflərdə plastik qayçılardan daha çox istifadə edilir.

 

Məktəbli ləvazimatları seçərkən diqqət etməli olduğunuz bir sıra əsas məqamlar bunlar idi. Keyfiyyət, yaş uyğunluğu, ölçü və digər meyarlara əsasən seçim etdiyiniz zaman məhsullar istifadəniz üçün daha yararlı olacaqdır. Övladlarınızın məktəbli ləvazimatlarına yanaşması məhsula qarşı duyduğu sevgidən və həvəsdən birbaşa asılıdır. Buna görə də seçim edərkən onların fikrini nəzərə almaq da üstün üsullardan hesab olunur. 

 Uşaqlarınız üçün keyfiyyətli, onların istədiyi məktəb ləvazimatlarını bu linkdən daxil olaraq ala bilərsiniz.

Əsas məktəb ləvazimatlarının siyahısı:

 

·         Karandaş və qələmlər

·         Yonan, xətkeş, silgi

·         Dəftər və üzlüklər

·         Albom, rəsm üçün fırçalar

·         Rəngli kağız və karton

·         Qayçı, yapışqan

·         Boya üçün önlük

 

Bəs sizcə məktəb ləvazimatlarını necə seçmək olar?